Ramthanmawia, MLA leh Dr. L. Thangmawia, Ex- MLA ten Hnam Run ah eng thu nge an sawi

by Editor

Tualchhung News

KUM CHANVE AWRHA INSAWIFIAH NASA SORKAR AN LA AWM NGAI LO: Dr. L Thangmawia, EX-MLA

KAN CM HIAN THUDIK TAWK LO HI A THUDIK SAWI HMIAH HMIAH THIN: Ramthanmawia, MLA

ZORAM TODAY| 26th August, 2024 (Mon): Vawiin khan Mizo Hnam Run inkhawmah Dr. L. Thangmawia, Ex-MLA & GS MNF GHQ chuan ZPM sorkar hi kum chanve awrh chauh an la kal a, hetiang em ema insawifiah nasa sorkar hi a awm ka la hre ngai lo, a ti.

“An sorkar tirh khan chief minister-in minister-te dept enkawl dan tur road map kan nei vek a, kan policy duan tawhsa angin an kal ang, a ti a. Amaherawhchu tun thlengin mipuiin an road map kan la hmu lo. An sawi loh ang zelin an kal,” a ti.

L. Thangmawia chuan Mizoram inthlanpui result zirchianna (mathematical analysis) atanga tehin MNF chu mipuiin an hnawl lo, a ti a. “Inthlan hnuhnung berah bial 13-ah chuan voter tharte nen kan vote hmuh per cent a pung a, bial 22-ah MNF candidate-ten inthlan hmasa aia sang zawk vote an hmu,” a ti.

ZPM-ten LO ANG an tih thenkhat sawiin: CM-in portfolio a nei lo ang, designation plate tar ve lo ang, restricted tender ti ve lo ang, minister-te zin zui duah lo ang, chhiah tipung lo ang, party unit-in MLA fund an thawk lo ang, work order cancel lo ang, etc. bakah sum kan puk ve lo ang an tih chu thla ruk chhungin Rs vbc 1949 an puk der tawh.

“ANG an tih zingah bangla a ngaiin kan chhawm ang, contactor chauhin hna an thawk ang, MLA hamthatna a chanvein kan tihniam ang, a tihte pawh an sawi loh ang zelin an kal.

“Tin, khuallian sawisel nasatu an ni, mah se tunah hian nuam ti ber an ni a. CM adviser an sawisel thin, mah se adviser ngah ber an ni. Kum chanve awrh an la kal, hetiang anga insawifiah nasa sorkar hi an awm ka la hre ngai lo,” a ti.

Thangmawia chuan: “MNF hian insiamthat kan ngai. Ruling kan nih laiin a malsawmnaah kan lo tlu sual a ni thei. Pu Laldenga ten Mizoram hmakhua tur vision an neihte tihlawhtling turin ZPM chetsual chang lovin keimahni ngei hian theihtawp kan chhuah a tul,” a ti.

Thusawitu dang, Ramthanmawia (Papuia), MLA chuan Mizoram Assembly ni hnih awh session neih zawh tak chungchang a sawi a, "Thla 8 sorkar hi Zoram mipuiin an hre tan mek a. Pawn lam atanga an insawi ang ngawt a ni lo tih chu anmahni ngei pawhin an inhre chho mek," a ti.

“Assam Rifles chungchangah CM-in AR leh Mizoram sorkarin MoU hran ve ve an ziak angin House-ah a sawi a. RTI chhanna erawh AR-in MoU an duang a, Mizoram sorkarin a lo endik tih a ni. CM-in ka thusawi a dik zawk a tite kha RTI zahawmna tihbawrhbanna a ni.”

Papuia chuan, "Kan minister-te an inzir peih lo. Anmahni flagship program chungchang zawh belhna pawh an chhang hlei thei lo," a ti.

"I-Day khan CM chuan electric power man ba kan pe tla vek tawh a, rebate Rs vbc 35 chuang kan hmu let zawk, a tih kha Assembly session-a ka zawhna chhanna chu 'Electric bill ba Rs. vbc 134.90 a awm' tih a ni.

"Sasci Rs vbc 500 min lo pe tawh a tih pawh, ka zawhna chhanna chu - August 14 thleng khan release order kan la dawng lo tih a ni. Kan CM hian thudik tawk lo hi a thudik sawi hmiah hmiah thin," a ti.

MNF sorkar laia covid vanga sum puk sawiseltute khan tunah hian (August 20, 2024 thleng khan) Rs vbc. 2046.19 an puk tawh a. Chhiah pawh an tipung zel dawn a, mipuite min hrek chho dawn a ni. Healthcare-te hi a hmaa kan kalpui tho kha a hming thlakin MNF sorkarin a lo sual chhuah ADB loan project Rs vbc 1000 chu an nghak tawp a ni,” Papuia chuan a ti.

Inkhawm hi Phairothanga, Adviser MNF GHQ-in a kaihruai a. K. Lalremthangi, Adviser MNF GHQ-in hunserh a hmang a ni.